Si çdo vit, projekti “Aftësi për Punë” ka hartuar raportin e gjurmimit të të diplomuarve të vitit 2019. Në këtë publikim paraqiten të dhëna nga ndjekja e të diplomuarve nga institucionet partnere të AFP 1 vit pas diplomimit.

Nga ky raport vihen re tendenca pozitive që tregojnë rritjen e punësueshmërisë e të ardhurave të të diplomuarve nga arsimi dhe formimi profesional, si dhe përmirësimin e imazhit të përgjithshëm të AFP.

Numri i të atyre që diplomohen nga 6 shkolla partnere është rritur afërsisht me 30% nga viti 2016.

Përqindja e të diplomuarve që janë në punë (12 muaj pas diplomimit) është rritur me 17% (nga 34% për të diplomuarit në vitin 2016 në 51% për të diplomuarit në vitin 2019). Numri i profesionisteve te rinj që kontribuojnë në kompanitë shqiptare nga këto 6 shkolla është dyfishuar.

Më shumë të diplomuar nga AFP po marrin paga më të larta në vitin e parë të punës. Grupi i pagave të larta mujore (mbi 50,000 lekë NETO) ka arritur 24% për të diplomuarit e vitit 2019 (paga mesatare në semestrin e dytë të vitit 2020 ishte 44,945 lekë).

Më shumë nxënës të mirë po i zgjedhin shkollat partnere të projektit. Mesatarja e nxënësve që regjistrohen në arsim profesional në klasat e 10-ta është rritur me një notë nga viti 2017 (kur projekti filloi të mbledhë këtë të dhënë).

Ndërkohë, 86% e të diplomuarve në vitin 2019 thonë që do të zgjidhnin të njëjtën shkollë.

Rezultatet e gjurmimit të secilit nga ofruesit partnerë të S4J u prezantuan në Njësitë e Zhvillimit përkatëse nga Koordinatorët e Gjurmimit, duke vijuar me analiza dhe diskutime mbi arritjet e institucionit dhe mundësitë për përmirësim.