Vitet e fundit jemi dëshmitarë të modernizmit të arsimit profesional. Projekti “Aftësi për Punë” vazhdon të mbështesë mësuesit në zhvillimin e vazhduar profesional pedagogjik dhe teknik dhe krijimin e kushteve të nevojshme për aplikimin e qasjeve bashkëkohore të të nxënit. Shkollat partnere kanë përqafuar format e reja të mësimdhënies, duke aplikuar metoda novatore e interaktive. Integrimi më i lartë i teknologjisë në mësimdhënie, digjitalizimi i materialeve mësimore dhe orientimi drejt mësimit të kombinuar përfaqësojnë linjat kryesore të zhvillimit në shkollat tona, duke iu përshtatur edhe nevojave dhe preferencave të brezave të rinj.

Ky botim i kushtohet mësimit të kombinuar, si një ndër format novatore të mësimdhënies. Gjashtë mësues të shkollave tona partnere japin dëshmitë e tyre se si ata aplikojnë modele të ndryshme të mësimit të kombinuar. Këto praktika të mira, të shoqëruara me mësime të nxjerra dhe këshilla të vlefshme, do të mund t’ju vijnë në ndihmë si modele për t’u ndjekur, duke ia përshtatur konteksit në të cilin veproni. Ne do të vazhdojmë të punojmë edhe në të ardhmen në identifikimin dhe mbledhjen e praktikave të tjera të mira dhe në ndarjen e tyre me aktorë të shkollave të mesme profesionale, me besimin se replikimi i këtyre praktikave kontribuon në modernizimin e arsimit profesional.