Shpeshherë, kur flitet për dramën në klasë, njerëzit mendojnë rreth teatrit në edukim. E para është një metodologji lehtësisht e përdorshme nga cilido mësues si një formë mësimdhënieje e cila ndihmon nxënësit në zhvillimin e vazhdueshëm akademik dhe social, ndërsa i dyti është një proces i cili kërkon ekspertë në përdorimin e teknikave teatrale/dramatike interaktive për të ndihmuar procesin edukativ.

Nga studime të ndryshme të realizuara në Britaninë e Madhe, ku kjo teknikë është e përdorur gjerësisht, drama në klasë ka rezultuar shumë produktive, pasi nxënësi është i aftë të krijojë ndërgjegjësim për veten dhe vë në përdorim mendjen, trupin, zërin – pra nxënësi fizikisht dhe mendërisht është i gjithëpërfshirë në procesin mësimor. Gjithashtu, nxënësi rrit qartësinë dhe kreativitetin në komunikimin e ideve të artikuluara dhe jo të artikuluara – kjo nëpërmjet zgjidhjes së një situate të krijuar nga mësuesi.

Duke parë rëndësinë e kësaj metodologjie, projekti “Aftësi për Punë” organizoi aktivitetin “Drama në Klasë”. Ky aktivitet u organizua në formën e një prezantimi të teknikave të kësaj metodologjie nëpërmjet lojës. Prezantimi u zhvillua nga ekspertja në Edukimin nëpërmjet Dramës dhe Teatrit, Dr. Sonila Kapidani, duke vijuar më pas me një panel diskutimi me të ftuar Prof. As. Dr. Robert Gjedia. Qëllimi i këtij sesioni ishte njohja dhe diskutimi rreth metodave alternative të mësimdhënies me në qendër nxënësin. Gjatë këtij diskutimi, ekspertja Sonila Kapidani u shpreh se:

Mësuesit mund të shmangin përdorimin e dramës në klasë sepse kanë frikë se ajo kërkon përgatitje të lodhshme, që marrin kohë, ose nxënësit nuk do ta marrin seriozisht mësimin pasi aktivitetet e dramës janë të gjalla. Kjo mund të bëjë që arsimtarët të anashkalojnë dramën si një mjet të rëndësishëm për mësimdhënien në përgjithësi dhe për mësimin e aftësive specifike në veçanti.

Aktiviteti u shfaq live në faqen Facebook të projektit “Aftësi për Punë” dhe mund ta ndiqni më poshtë.