Krijimi i klubeve të inovacionit ishte një nga risitë më të përfolura të këtij viti për sa i përket arsimit profesional. Këto klube shërbejnë si mjedise sociale të cilat tërheqin nxënësit dhe i motivojnë të gjenerojnë ide e të angazhohen në aktivitete të ndryshme.

Përgjatë muajve të fundit, janë zhvilluar në mënyrë të vazhdueshme edhe sesione trajnuese të organizuara në formën e takimeve interaktive. Gjatë këtyre trajnimeve, të ftuar të ndryshëm kanë ndarë eksperiencat e tyre personale dhe kanë diskutuar me të rinjtë rreth mundësive të shumta që fusha e inovacionit ofron. Këto takime informuese jo vetëm shërbejnë si një mënyrë shumë efektive për të ndarë përvoja, por gjithashtu qartësojnë më shumë idetë e të rinjve të cilët kanë nevojë t’i konkretizojnë ato. Tregu global i punës dhe dinamikat e zhvillimit të tij, aftësitë e buta që tregu i punës kërkon më së shumti, sipërmarrja, rëndësia e një plani strategjik dhe krijimi i një plani praktik për të ardhmen, janë vetëm disa nga temat që janë prekur dhe diskutuar gjatë këtyre takimeve.

Diversiteti që karakterizon nxënësit në këto klube inovacioni ka bërë që këto takime të jenë të veçanta dhe shumë produktive. Nëpërmjet lojërave të ndryshme interaktive, nxënësit kanë bashkëpunuar me njëri-tjetrin për të përmirësuar aftësinë e të punuarit në grup e krijimit të sinergjisë brenda skuadrave. Ka rënë veçanërisht në sy dëshira e madhe që nxënësit kanë për të marrë pjesë në lojëra e aktivitete, gjatë të cilave ata njihen më mirë me njëri-tjetrin dhe nxjerrin në pah personalitetet e tyre dinamike. Pas këtyre aktiviteteve, Klubet e Inovacionit tashmë kanë nisur të veprojnë si një hapësirë rinore e menaxhuar nga vetë nxënësit, duke krijuar një ambient motivues ku inovacioni lulëzon.