Praktika profesionale në biznes nënkupton aftësimin e nxënësve duke i vendosur ata në kushte dhe poste reale pune në mjediset e biznesit. Në këtë mënyrë, përveç njohurive teorike mbi profesionin e ardhshëm, nxënësit mund të përfitojnë kompetenca profesionale që burojnë nga vënia në praktikë e këtyre njohurive, si dhe kompetenca të tjera të përgjithshme (aftësi të transferueshme apo të punësueshmërisë), të cilat mund të përvetësohen siç duhet në mjedise reale pune dhe që i ndihmojnë nxënësit si punonjës të ardhshëm të jenë më të përgatitur për tregun e punës.

Manuali “Praktika profesionale në biznes” ka si qëllim mundësimin e zhvillimit të praktikave profesionale cilësore në biznes si një element i domosdoshëm për fitimin e kompetencave profesionale nga nxënësit dhe për lehtësimin e integrimit të tyre në tregun e punës. Manuali shërben si një mjet orientues për shkollat profesionale për ndërtimin e kapaciteteve dhe sigurimin e cilësisë në implementimin cilësor të praktikës profesionale në biznes. Për hartimin e manualit janë shfrytëzuar materialet e përgatitura nga projekti “Aftësi për Punë” (S4J) në lidhje me praktikat profesionale në biznes, si dhe udhëzuesit dhe studimet e mëparshme të realizuara nga institucionet e lidhura me arsimin profesional në Shqipëri.

Diversifikimi i ofertës mësimore në kuadër të shkollave profesionale nënkupton përshtatjen e vazhdueshme të ofertës mësimore të shkollës me kërkesat gjithnjë në ndryshim të tregut të punës, veçanërisht në nivel vendor dhe rajonal. Kjo përfshin jo vetëm përditësimin e programeve mësimore por edhe ofrimin e kualifikimeve të reja për të cilat ka nevojë tregu rajonal i punës. Procesi i diversifikimit të ofertës mësimore kërkon angazhimin e shumë aktorëve brenda shkollës, bashkëpunim të vazhdueshëm dhe efikas me sektorin privat, dhe mbi të gjitha përkushtim dhe kohë. Ai është i rëndësishëm për pajisjen e nxënësve me njohuritë, aftësitë dhe kompetencat e nevojshme për punësim dhe zhvillim profesional të suksesshëm.

Manuali “Diversifikimi i ofertës mësimore” synon t’u ofrojë shkollave profesionale në vend sugjerime praktike për zbatimin me sukses të procesit të diversifikimit të ofertës mësimore. Manuali bazohet te përvojat e shkollave profesionale të përfshira në projektin “Aftësi për punë” (S4J) në diversifikimin e ofertës mësimore, në veçanti te mësimet e nxjerra nga zbatimi i këtij projekti, por dhe tek parimet bazë të diversifikimin të ofertës mësimore dhe praktikat më të mira bashkëkohore në vendet europiane. Në këtë kuptim, manuali jo vetëm dokumenton njohuritë e përftuara gjatë viteve të zbatimit të projektit “Aftësi për Punë” (S4J), por edhe siguron shpërndarjen e gjerë të këtyre njohurive për realizimin me sukses të procesit të diversifikimit të ofertës mësimore në të gjitha shkollat profesionale në vend.

Manuali “Vlerësimi i nxënësve përmes platformave digjitale”

Ky dokument mbështetës u vjen në ndihmë mësuesve të shkollave profesionale për të përdorur platforma digjitale si MësoVET për të vlerësuar ecurinë dhe arritjet e nxënësve. Ai përmban udhëzime praktike dhe video tutoriale për krijimin dhe përdorimin e veprimtarive vlerësuese, si kuicet dhe testet, duke thjeshtuar procesin e vlerësimit dhe përmirësuar përvojën e nxënësve në mësim. Dokumenti përfshin gjithashtu një kapitull të dedikuar për nxënësit, duke i ndihmuar ata të përfshihen aktivisht në procesin e vlerësimit. Versioni online i manualit

Dokumenti orientues “Pedagogjia digjitale në arsimin profesional”

Ky dokument ndihmon mësuesit e arsimit profesional të adoptojnë teknologjitë arsimore në mësimdhënie, duke ndërthurur metodat tradicionale me mjetet digjitale. Ai përmban shembuj konkretë dhe rekomandime për krijimin e një mjedisi mësimor gjithëpërfshirës dhe interaktiv, duke i ndihmuar mësuesit të përshtaten me nevojat dhe pritshmëritë e nxënësve. Dokumenti është pasuruar me hapa praktike dhe video tutoriale për mësuesit dhe nxënësit.

Manual për përdorimin e platformës MësoVET

Ky manual praktik u ofron mësuesve dhe nxënësve udhëzime të detajuara për përdorimin efektiv të platformës MësoVET, platforma me bazë Moodle e adaptuar në shqip për arsimin profesional, ku shkollat profesionale kanë hapësirën e tyre të dedikuar. Ai përmban udhëzime praktike për funksionet e platformës,  hapjen dhe menaxhimin e lëndëve, krijimin e aktiviteteve mësimore dhe personalizimin e përmbajtjes për të përmbushur objektivat mësimore.

Manuali “Mësimi i kombinuar nga planifikimi në zbatim”

Ky manual i ofron mësuesve udhëzime konkrete për planifikimin dhe zbatimin e metodave të mësimit të kombinuar, duke ndërthurur mësimin tradicional me teknologjitë arsimore dhe teknikat bashkëkohore  pedagogjike në funksion të objektivave mësimore. Ai ndihmon në krijimin e një përvoje gjithëpërfshirëse dhe interaktive të të nxënit,  me shembuj praktikë dhe metoda didaktike për të rritur angazhimin e nxënësve dhe për të maksimizuar rezultatet e tyre.

Dokumenti orientues “Krijimi i arkivës elektronike”

Ky material është hartuar për të lehtësuar procesin e ruajtjes, aksesit dhe administrimit të dokumentacionit voluminoz të shkollave profesionale duke krijuar arkivën digjitale në platformën MësoVET sipas standardeve të sigurisë dhe transparencës. Në të përfshihen udhëzime konkrete për procesin duke nisur me ngritjen e grupit përkatës të punës e deri tek lista e dokumenteve, depozitimi dhe menaxhimi i dokumenteve në mënyrë të sigurt dhe të aksesueshme, me kufizimet e nevojshme sipas funksioneve të stafit drejtues dhe mësimdhënës.

Dokumenti orientues “Roli i Koordinatorit të Digjitalizimit në shkollat profesionale”

Roli i Personit Kyç të Digjitalizimit që lindi me mbështetjen e projektit “Aftësi për Punë” është tashmë i institucionalizuar në kuadrin normativ të arsimit profesional. Ky dokument orientues ndihmon shkollat profesionale të identifikojnë dhe fuqizojnë rolin kyç të Koordinatorit të Digjitalizimit në modernizimin e institucioneve të arsimit dhe formimit profesional. Ai përshkruan përgjegjësitë  e këtij pozicioni dhe përmban këshilla praktike për kryerjen e detyrave dhe kapacitimin e tij, duke theksuar edhe aftësitë tekniko-pedagogjike të nevojshme për të mbështetur procesin e zhvillimit të digjitalizimit në arsim.

Dokumenti orientues “Hartimi i materialeve mësimore digjitale”

Projekti “Aftësi per Punë” ka mbështetur ciklin e hartimit, digjitizimit dhe sigurimit të cilësisë  të materialeve mësimore digjitale të aksesueshme në platformën MësoVET. Kjo përvojë disavjeçare është sjellë në këtë dokument që synon të ndihmojë mësuesit  e arsimit profesional të zhvillojnë përmbajtje didaktike digjitale të përshtatshme dhe gjithëpërfshirëse në funksion të realizimit të objektivave të të nxënit. Ai përmban udhëzime didaktike dhe këshilla praktike se si mund të zhvillohet një material mësimor në formën fillestare e deri në ngarkimin e tij me mjete tërheqëse dhe efektive në platforma si Mësovet.

Dokumenti orientues “Mësimi hibrid – Dokument orientues për shkollat profesionale”

Ky dokument u vjen në ndihmë mësuesve të programeve pas të mesme të arsimit profesional për të zbatuar metoda hibride të mësimit, duke kombinuar fleksibilitetin e mësimit në distancë me përvojën e klasës fizike. Ai ofron shembuj praktikë për një qasje gjithëpërfshirëse dhe novatore, duke përfshirë këshilla për organizimin e procesit mësimor dhe përdorimin e mjeteve teknologjike për të maksimizuar rezultatet e kursantëve. Dokumenti përshkruan gjithashtu procesin e pilotimit të këtij modaliteti në programet pas të mesme përmes planit të veprimit dhe burimeve të nevojshme infrastrukturore dhe njerëzore për realizimin e tij.

Nga vizioni në realitet – Raste të suksesshme të një ore mësimore me platformën MësoVET

Ky publikim sjell raste konkrete të përdorimit të platformës MësoVET në orët e mësimit, duke sjellë përvoja frymëzuese nga mësues të arsimit profesional. Përveç përshkrimit të orëve mësimore me modalitet të kombinuar, publikimi përmban këshilla praktike  se si mësuesit mund  të integrojnë teknologjinë arsimore në mënyrë kreative dhe efektive për të rritur angazhimin dhe arritjet e nxënësve, duke lehtësuar njëkohësisht punën e tyre.

Praktika të mira të digjitalizimit të mësimdhënies

Ky botim  sjell praktikat pozitive të mësuesve që kanë përqafuar teknologjinë në procesin mësimor duke u ndalur në këndvështrime dhe teknika specifike. Shembujt konkretë dhe këshillat praktike të botimit synojnë të ndihmojnë arsimtarët e AFP-së të ndërthurin teknologjitë digjitale në mënyrë krijuese, duke i frymëzuar ata të shfrytëzojnë potencialin e plotë të mjeteve digjitale në funksion të arritjes së objektivave mësimore.

Manuali “Organizimi dhe funksionimi i Njësisë së Zhvillimit”

Ky manual ofron udhëzime të qarta për krijimin dhe menaxhimin e Njësisë së Zhvillimit (NJZH) në shkollat profesionale. Ai përfshin një kornizë të detajuar të strukturës organizative, roleve dhe përgjegjësive të secilit anëtar të njësisë, si dhe procedurat për planifikimin, zbatimin dhe monitorimin e aktiviteteve që lidhen me zhvillimin e shkollës. Ky dokument synon të rrisë efektivitetin e institucioneve të arsimit profesional duke fuqizuar rolin e NJZH-së si një strukturë kyçe për zhvillimin institucional dhe përputhjen me kërkesat e tregut të punës. Manuali është një mjet thelbësor për sigurimin e cilësisë dhe avancimin e ofertës mësimore në përputhje me standardet kombëtare dhe ndërkombëtare. Manuali është pjesë e rregullores së Njësisë së Zhvillimit e punuar gjithashtu si model nga projekti “Aftësi për Punë”. Versioni online i manualit

 

Udhëzuesi “Planifikimi, monitorimi dhe raportimi vjetor e afatmesëm”

Ky është një dokument praktik i hartuar për të mbështetur institucionet e AFP në Shqipëri në zhvillimin e planeve strategjike dhe vjetore, bazuar në standardet kombëtare dhe praktikat më të mira të projektit “Aftësi për Punë” (S4J). Ai synon të ndihmojë shkollat të realizojnë procese gjithëpërfshirëse e të bazuara në të dhëna për përmirësimin e performancës dhe përmbushjen e standardeve ligjore dhe të cilësisë. Manuali ofron një proces të strukturuar që përfshin të gjithë ciklin e planifikimit, nga ngritja e grupit të punës, analiza e situatës së brendshme dhe të jashtme, deri te hartimi dhe zbatimi i planit vjetor dhe afatmesëm. Versioni online i udhëzuesit

Manuali “Menaxhimi i procesit mësimor”

Mbështetur në bazën ligjore për arsimin profesional dhe në praktikat e mira të projektuara nga projekti “Aftësi për Punë” (S4J), manuali ofron një qasje të strukturuar në menaxhimin e procesit mësimor përmes një cikli të plotë që përfshin planifikimin, zbatimin, monitorimin dhe raportimin e të nxënët në shkollë dhe në biznes. Dokumenti thekson rëndësinë e një organizimi të mirë të procesit mësimor, duke përfshirë bashkëpunimin midis drejtuesve të shkollës, departamenteve dhe bizneseve partnere, për të siguruar cilësi në mësimdhënie dhe rezultate të arritshme për nxënësit. Manuali detajon rolin e aktorëve kryesorë, si Drejtoria, Njësia e Zhvillimit dhe mësimdhënësit, dhe siguron instrumente dhe procedura praktike për lehtësimin e këtij procesi. Versioni online i manualit